გლდანის რაიონში, მესამე მიკრორაიონის N9 კორპუსთან, ახალი სკვერი მოეწყო, რომელიც ადგილობრივ მოსახლეობას კომფორტული დასასვენებელითა და გასართობი სივრცით უზრუნველყოფს. პროექტი დღეს დასრულდა და ახალი რეკრეაციული ზონა 19:00 საათზე კონცერტით გაიხსნება. ამ ღონისძიებას დედაქალაქის მერი კახა კალაძე და მისი მოადგილე კახა გულედანიც დაესწრებიან.
გლდანის რაიონის მესამე მიკრორაიონში არსებული სკვერის მოწყობის პროექტი მიზნად ისახავს არა მხოლოდ გარემოს გაამწვანებას, არამედ მოსახლეობისთვის სხვადასხვა ტიპის აქტივობისა და დასვენების პირობების შექმნას. პროექტის ფარგლებში, მოეწყო მოსასვენებელი ზონები, სადაც ადგილობრივებს შეუძლიათ მშვიდად გაატარონ დრო, ხოლო ბავშვებისთვის შექმნილია სპეციალური გასართობი სივრცეები.
პროექტის ფარგლებში რეაბილიტაცია ჩაუტარდა საფეხბურთო და კალათბურთის მოედნებს, რომლებიც სრულად მოწესრიგდა და ადაპტირებულია თანამედროვე სტანდარტების შესაბამისად. ასევე, გაიხსნა ფიტნეს ზონა, სადაც მოსახლეობა ფიზიკური აქტივობებით შეძლებს დაკავდეს. სკვერში განთავსდა ახალი პავილიონები, მოეწყო სარწყავი სისტემა, დამონტაჟდა გარე განათება, ხოლო ადგილობრივი გამწვანება განახლდა – დაირგო ხე-მცენარეები და რულონური ბალახი.
პროექტი განხორციელდა გლდანის რაიონის გამგეობის ბიუჯეტის მეშვეობით და საერთო ჯამში 1 242 522 ლარი დაიხარჯა. სამუშაოები დაახლოებით 6,000 კვადრატულ მეტრზე განხორციელდა, რაც სკვერის სრულყოფილ და მრავალფუნქციურ გარემოს ქმნის.
მასალის გამოყენების პირობები
