თბილისში მეორე საერთაშორისო სიმპოზიუმი გაიხსნა, რომლის მიზანიც უგზო-უკვლოდ დაკარგული პირებისა და სტიქიური უბედურებების მსხვერპლთა დნმ-ამოცნობაა. ღონისძიება საქართველოს წითელი ჯვრის საზოგადოების ორგანიზებით გაიმართა, რომელსაც აქტიურად უჭერს მხარს წითელი ჯვრის საერთაშორისო კომიტეტი და მისი სასამართლო-სამედიცინო გენეტიკის ცენტრი.
სიმპოზიუმში პრაქტიკოსი გენეტიკოსები 13 ქვეყნიდან მონაწილეობენ, მათ შორის ევრაზიიდან, ახლო აღმოსავლეთიდან და აზიიდან. მთავარი მიზანი არის მონაწილეებისთვის პრაქტიკული ტრენინგების ჩატარება, რაც მოიცავს დნმ-თანხვედრის და ფართომასშტაბიანი ამოცნობისას სტატისტიკური ანალიზის გამოყენებას.
მონაწილეები აქცენტს გააკეთებენ მასიური ამოცნობის პროცესში არსებული გამოწვევების განხილვაზე, ასევე განიხილავენ წარმატებული პროგრამების საკვანძო ელემენტებს. პრაქტიკოსი სპეციალისტები ერთმანეთს გაუზიარებენ ცოდნას და გამოცდილებას, რაც ხელს შეუწყობს საერთაშორისო თანამშრომლობის გაღრმავებას.
წითელი ჯვრის საერთაშორისო კომიტეტის წარმომადგენლები ხაზგასმით აღნიშნავენ, რომ მათი მიზანი არის გარდაცვლილთა ღირსების დაცვა და უგზო-უკვლოდ დაკარგული პირების ადგილსამყოფელის დადგენა მხოლოდ ჰუმანიტარული მიზნით.
მასალის გამოყენების პირობები
