თბილისის ზღვის მიმდებარე ტერიტორია საყოფაცხოვრებო და სამშენებლო ნარჩენებისგან შპს „თბილსერვის ჯგუფის“ თანამშრომლებმა გაწმინდეს. დასუფთავების აქცია თბილისის მერიამ დააფინანსა და ადგილობრივი მოსახლეობისა და კერძო სექტორის აქტიური მხარდაჭერით განხორციელდა.
დასუფთავების პროცესში მონაწილეობა მიიღო „თბილსერვის ჯგუფის“ დირექტორმა გიორგი პაპავამ, მან ადგილობრივ მოსახლეობას მიმართა, რომ გაითვალისწინონ გარემოს დაცვის კანონმდებლობა და ნუ დააბინძურებენ ქალაქს. „ძალიან დასანანია, რაც აქ ხდება. მსგავს პრობლემებს თბილისის მასშტაბით მხოლოდ მუნიციპალიტეტი საკუთარი რესურსით ვერ მოაგვარებს, თუ მოქალაქეების მხრიდანაც არ იქნება მხარდაჭერა. ამ მხრივ, მნიშვნელოვანია საზოგადოების ცნობიერების ამაღლება. ერთად გავუფრთხილდეთ ჩვენს ქალაქს, თავისი გამწვანებული და რეკრეაციული სივრცეებით,“ – განაცხადა გიორგი პაპავამ.
თბილისის მერია აღნიშნავს, რომ მსგავსი ნარჩენებისგან ტერიტორიის გაწმენდის გარდა, გლდანის რაიონში, თბილისის შემოვლითი გზის მე-15 კილომეტრზე ფუნქციონირებს სამშენებლო ნარჩენების განთავსების სპეციალური ობიექტი. ეს ობიექტი მოქალაქეებსა და კომპანიებს საშუალებას აძლევს, კანონიერად, შეღავათიან ფასებში განთავსონ სამშენებლო და ინერტული ნარჩენები. ტარიფები შემდეგია: 1-დან 5 ტონამდე – 9 ლარი, 5-დან 10 ტონამდე – 18 ლარი, ხოლო 10 ტონაზე მეტი – 30,6 ლარი.
თბილისის მერია მოუწოდებს ყველა მოქალაქეს და ბიზნესსექტორს, აქტიურად შეინარჩუნონ ქალაქის სუფთა და გამწვანებული გარემო. „თბილსერვის ჯგუფი“ ამასთანავე უზრუნველყოფს შესაბამისი ინფორმაციის მიწოდებას და დახმარებას, მისი ცხელ ხაზისა და ვებგვერდის მეშვეობით.
