თბილისში TRACECA-ს (ევროპა-კავკასია-აზიის სატრანსპორტო დერეფანი) ეროვნული მდივნების სხდომა გაიმართა, რომელშიც ორგანიზაციის წევრი ქვეყნებიდან მაღალი რანგის ტრანსპორტის უწყებების წარმომადგენლები მონაწილეობდნენ. სხდომის თავმჯდომარე იყო საქართველოს ეკონომიკისა და მდგრადი განვითარების მინისტრის მოადგილე გურამ გურამიშვილი, ხოლო შეხვედრაში ასევე იმყოფებოდა TRACECA-ს გენერალური მდივანი ასეტ ასავბაევი.
გურამიშვილმა მისასალმებელ სიტყვაში ხაზი გაუსვა TRACECA-ს მნიშვნელობას და აღნიშნა, რომ დერეფანი მნიშვნელოვან როლს ასრულებს სატრანსპორტო, სავაჭრო და ეკონომიკური კავშირების გაძლიერებაში. ისაუბრა საქართველოში მიმდინარე სატრანსპორტო-ლოგისტიკური ინფრასტრუქტურის პროექტებზე, მათ შორის ანაკლიის ღრმაწყლოვანი ნავსადგურის, რკინიგზის მოდერნიზაციისა და ბაქო-თბილისი-ყარსის რკინიგზის განვითარების შესახებ, რომლებიც ხელს შეუწყობს ქვეყნის სატრანზიტო-ლოგისტიკური ფუნქციის გაძლიერებას.
სხდომაზე განხილული იყო TRACECA-ს სატრანსპორტო კავშირების და სასაზღვრო პუნქტების გაუმჯობესების საკითხები, ასევე სატვირთო ოპერაციების გაციფრულების პერსპექტივები. ამასთან, წევრმა ქვეყნებმა შეთანხმება დადეს, რომ გააგრძელებენ აქტიურ მუშაობას დერეფნის ეფექტურობისა და კონკურენტუნარიანობის გაზრდის მიმართულებით.
2024 წლის იანვარ-ოქტომბრის პერიოდში, საქართველოში სატრანსპორტო გადაზიდვების მოცულობა გაიზარდა. სახმელეთო ტრანსპორტით 23.5 მილიონი ტონა ტვირთი გადაზიდა, ხოლო საზღვაო ნავსადგურებში ტვირთის გადამუშავება 8%-ით გაიზარდა. განსაკუთრებული ყურადღება გამახვილდა ჩინეთიდან/კენ საქართველოს გავლით გადაზიდულ კონტეინერებზე, რომელთა რაოდენობა 13-ჯერ გაიზარდა.
TRACECA-ს დერეფნის კონკურენტუნარიანობის გაზრდა მნიშვნელოვანი სტიმული იქნება რეგიონში ეკონომიკური და სავაჭრო კავშირების განვითარებისთვის.
#drpkhakadze #davidiani #shenitbilisi
