„ათი მიზეზი, რატომ უნდა შეიყვარო თბილისი“ – ამ სათაურით, ბრიტანული დაბალბიუჯეტური ავიაკომპანია easyJet-ი საქართველოს დედაქალაქზე სტატიას ავრცელებს თავის საბორტო ჟურნალ Traveller-ში, სადაც აღნიშნულია, რატომ მოხვდა თბილისი ავიაკომპანიის 2025 წლის მოსანახულებელ ქალაქთა სიაში.
„საქართველოს დედაქალაქი პოპულარობის ზენიტშია. თბილისი მომნუსხველი ქალაქია, სადაც ქვაფენილიანი ქუჩები და ქალაქის ისტორიული ცენტრი მის მრავალსაუკუნოვან ისტორიას უსვამს ხაზს. ქალაქი გარშემორტყმულია გორაკებით, რომელიც არაერთ თავგადასავალს გთავაზობთ. აი, მიზეზები, რის გამოც თბილისი 2025 წელს ჩვენს სიაში მოხვდა.
თავისი არსებობის მანძილზე რამდენიმე დიდი სახელმწიფოს მიერ დაპყრობილი დედაქალაქის არქიტექტურა ეკლექტური და ჭრელია. აქ ნახავთ ყველაფერს, დაწყებული მონუმენტური საბჭოური შენობებიდან, როგორიცაა ქორწინების სასახლე, დასრულებული პარიზული და, ამავდროულად, ოსმანური სტილის რუსთაველის პროსპექტით“, – წერს გამოცემა.
მნიშვნელოვანია, რომ 158-გვერდიან გამოცემაში თბილისს სამი სრული გვერდი ეთმობა, სადაც აღწერილია ქალაქის კულტურა, სამზარეულო და ღვინო. სტატიაში აღნიშნულია, რომ საქართველო – ღვინის სამშობლო – არის ადგილი, სადაც ქვევრში ღვინის დამზადების უძველესი კულტურა რვა ათას წელიწადს ითვლის.
easyJet-ი თბილისი საერთაშორისო აეროპორტში ოპერირებას 31 მარტიდან დაიწყებს და ფრენებს ლონდონის, ჟენევისა და მილანის მიმართულებით, კვირაში ექვსი სიხშირით შეასრულებს.
#drpkhakadze #გიორგიფხაკაძე #davidiani #shenitbilisi #აქხარისხია
QR კოდი
სტატიის ციტირება
შენი თბილისი. (2026). „ათი მიზეზი, რატომ უნდა შეიყვარო თბილისი“ – ბრიტანულმა ავიაკომპანია easyJet-მა საქართველოს დედაქალაქზე სტატია გამოაქვეყნა. 10 ივნისი, 2026. https://shenitbilisi.ge/ათი-მიზეზი-რატომ-უნდა-შე/
