ავტორი: ლიზი გრიგოლავა
sheniinterieri.ge გთავაზობთ ინტერვიუს ბექა მშვილდაძესთან, რომელიც პროფესიით ტელეოპერატორი გახლავთ, მაგრამ ამასთანავე შესანიშნავად ხატავს…
– ბექა, გვიამბეთ თქვენ შესახებ, რას საქმიანობთ, რა პროფესიის ბრძანდებით?
– ჩემი ძირითადი საქმიანობა არის ტელევიზია, ვიდეო ოპერატორი ვარ... რაც საკმაოდ მრავალმხრივი პროფესიაა და ბევრ სხვადასხვა სფეროს ეხება ყოველდღიურად.
-როგორც ვიცი, ხატავთ… როდის მიხვდით, რომ ეს საქმე განსაკუთრებულად გიტაცებდათ?
– კი, ვხატავ და ეს ძალიან მომწონს, ჩემი ცხოვრების განუყრელი ნაწილია… ზოგადად, ბავშვობიდან ვიცოდი, რომ ხატვა შემეძლო, მაგრამ სანამ დღეს ფინანსურ დამოუკიდებლობას არ მიაღწევ, რთულია, ვინმეს სთხოვო საღებავების, ფუნჯების და ტილოს თანხა… როდესაც ფინანსურ დამოუკიდებლობას მივაღწიე, მერე დავიწყე დიდ ტილოზე ხატვა… როცა სოციალურ ქსელში დიდი გამოხმაურება მოჰყვა ჩემს ნახატებს, ეს დიდ სტიმულს მაძლევდა და მივხვდი, რომ ეს ჩემ გარდა, სხვა ადამიანებსაც მოსწონდათ… საერთოდ არ მიფიქრია ნახატების გაყიდვაზე და, როდესაც უკვე შემოთავაზება წამოვიდა, ეს რაღაც ახალი გამოწვევა იყო და უფრო დავინტერესდი.
-რა არის თქვენი შთაგონების წყარო, როდესაც ხატვას იწყებთ?
–როგორც ასეთი, შთაგონების წყაროს რაიმე კონკრეტულს ვერ მივაწერ, ალბათ, არის გარემოებები, რაც მაძლევს იმის საშუალებას, ავიღო ფუნჯი, მასტერხიმი და ვხატო. ეს ყოველთვის ინდივიდუალურია… მე ვარ თვითნასწავლი და ვფიქრობ, მეტი თავისუფლება მაქვს, რასაც მინდა, იმას დავხატავ… ჩარჩოში არ ვარ და ჩემი შთაგონების წყარო ნებისმიერი რამ შეიძლება გახდეს… სიყვარული, ბუნება, ამინდი, რომელიმე კონკრეტული ცხოველი ან ფრინველი… ჩემი შთაგონების წყარო არის ბატონი ვანო აბულაძე, ერთ–ერთი გამორჩეული მხატვარი, რომელსაც დიდ პატივს ვცემ, ჩემი პირველი ნახატი მისი ინსპირაცია იყო. მისი ნახატი გადმოვხატე ჩემი ინტერპრეტაციით.
-რომელია თქვენი ყველაზე საყვარელი მხატვარი და რატომ?
– ვანო აბულაძე. ვანო უდავოდ ნიჭიერი მხატვარია, რომელიც ცარცითა და პასტელებით ხატავს. მისი გამოფენა 14 მარტს პულმანში გაიმართება.
-როგორც ვიცი, ადრე გამოფენა გქონდათ, გვიამბეთ ამ გამოფენის შესახებ და გეგმავთ თუ არა ახლო მომავალში ისევ?
–კი, გამოფენა ორჯერ მქონდა და,ჩემდა გასაკვირად, ორივე გამოფენამ წარმატებულად ჩაიარა. უამრავი ხალხი იყო, რამაც ნამდვილად გამაკვირვა. თვითნასწავლი ვარ და სწორედ ამან გამაოცა. მხატვრებიც კი მოვიდნენ და მითხრეს, ჩვენ 15 მხატვარი ერთად ვაკეთებთ გამოფენას და ამის ნახევარი ხალხიც კი არ არის ჩვენი ვიზიტორიო.
“არასოდეს თქვა არასოდეს”, მაგრამ აღარ მინდა საქართველოში გავაკეთო გამოფენა.
დიდი მადლობა, ბექა! უდავოდ, ნიჭიერი ბრძანდებით და შესანიშნავად ხატავთ.წარმატებები!❤️
#drpkhakadze #gochadze #sheniinterieri
