საქართველოს ეროვნული ბანკის ვიცე-პრეზიდენტმა ეკატერინე გალდავამ “თბილისის ფინანსური სამიტის” ფარგლებში პანელურ დისკუსიაში მონაწილეობა მიიღო. News.ge-ის ინფორმაციით, დისკუსიის მთავარი თემა ქვეყნებს შორის გადახდების განვითარება, ფინანსური ინფრასტრუქტურის ურთიერთთავსებადობა და რეგიონული ფინანსური კავშირების გაძლიერება იყო.
პანელის მონაწილეებმა სხვადასხვა ქვეყნის პრაქტიკაზე დაყრდნობით გააზიარეს საკუთარი გამოცდილება სწრაფი, უსაფრთხო და ეფექტიანი გადახდების განვითარების შესაძლებლობებსა და გამოწვევებზე. საუბარი ასევე შეეხო ტრადიციულ საგადახდო ტექნოლოგიებზე დაფუძნებული პროდუქტებისა და სტაბილკოინების გამოყენების პოტენციალს საერთაშორისო გადახდებში.
ეკატერინე გალდავამ მონაწილეებს საქართველოს ეროვნული ბანკის, როგორც რეგულატორის, ხედვა და გამოცდილება გაუზიარა. “ქვეყნებს შორის გადახდების განვითარებისთვის მნიშვნელოვანია არა მხოლოდ თანამედროვე ტექნოლოგიების დანერგვა, არამედ საგადახდო ინფრასტრუქტურების ურთიერromersებადობა, საერთო სტანდარტების არსებობა და მარეგულირებლებს შორის თანამშრომლობა” – განაცხადა მან.
პანელურ დისკუსიაში ეკატერინე გალდავასთან ერთად მონაწილეობდნენ SWIFT-ის, UnionPay International-ისა და ინდოეთის ეროვნული გადახდების კორპორაციის წარმომადგენლები. “თბილისის ფინანსური სამიტი” საქართველოს ეროვნული ბანკის, საქართველოს ეკონომიკისა და მდგრადი განვითარების სამინისტროსა და Global Finance & Technology Network-ის თანამშრომლობით გაიმართა.
წყარო: News.ge — ორიგინალი პუბლიკაცია · განახლდა 29 ოქტომბერი
