არქიტექტურა ქალაქის სავიზიტო ბარათია — ის იზიდავს ტურისტს შორეული ქვეყნიდან და აქ მოხვედრილს სწორედ ის უქმნის პირველ შთაბეჭდილებას.
თუმცა, შთაბეჭდილებებისა არ იყოს, ქალაქის იერსახეც ცვალებადია: შენობები ზოგჯერ ინგრევა, მათ ადგილას ახალი შენდება, წინათ ხეებით ამწვანებული გამზირები შიშვლდება ან პირიქით… ასეთია თბილისიც; ჩვენი დედაქალაქის იერსახეს წლებმა და ადამიანებმა კვალი დაატყვეს.
სწორედ ამ კვალის ფოტოებში ასახვა მოისურვა ფოტოგრაფმა მაიკო გაგუამ. ქართველი ფოტოგრაფი თავისი ახალი პროექტით ძველ კადრებს იდენტური რაკურსით აცოცხლებს და დროში გვამოგზაურებს.
პროექტმა დიდი პოპულარობა მოიპოვა, ფოტოებმა კი სოციალური ქსელი მოიცვა. სხვადასხვა გვერდზე გამოქვეყნებული ფოტოების კომენტარებში ბევრი წუხს, რომ ქალაქი ძველებურ იერსახეს კარგავს.
