გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტი 2023 წლის 4 სექტემბრიდან აქტიურად ახორციელებს გამონაბოლქვის კონტროლს საქართველოს ოთხ დიდ ქალაქში: თბილისში, რუსთავში, ქუთაისსა და ბათუმში. კანონმდებლობის ამოქმედებიდან 2024 წლის 4 ოქტომბრის ჩათვლით, გამოავლინეს 7610 სამართალდარღვევა, რაც ნათლად ადასტურებს ამ რეგულაციების აუცილებლობას.
მონაცემებზე დაყრდნობით, ყველაზე მეტი დარღვევა, 3694, თბილისში დაფიქსირდა. ქუთაისში 1449-ს, ბათუმში 1302-ს, ხოლო რუსთავში 1165-ს შეადგენს. კანონმდებლობის მიხედვით, 6629 ფიზიკური და 981 იურიდიული პირი დაჯარიმდა.
დაჯარიმების კატეგორიები მოიცავს:
- მსუბუქი ავტომობილები: 4706 შემთხვევა
- მიკროავტობუსები: 2597 შემთხვევა
- სატვირთო ავტომობილები: 298 შემთხვევა
- ავტობუსები: 9 შემთხვევა
ფიზიკური პირებისათვის ჯარიმები პირველ შემთხვევაში 100 ლარი, მეორეში 300 და მესამეში 600 ლარია. იურიდიული პირების შემთხვევაში, ჯარიმის ოდენობა 500, 1500 და 3000 ლარია. გარდა ამისა, 10 დღის ვადაში გადახდის შემთხვევაში, ჯარიმა 20%-ით მცირდება.
მოქალაქეება ჯარიმების გადამოწმება შეუძლიათ გარემოსდაცვითი ზედამხედველობის დეპარტამენტის ვებგვერდზე: www.des.gov.ge; ჯარიმის გადახდა შესაძლებელია შინაგან საქმეთა სამინისტროს ვებგვერდის – www.videos.police.ge საშუალებით.
გარემოსდაცვითი ზედამხედველობის დეპარტამენტი მიიჩნევს, რომ ატმოსფერული ჰაერის ხარისხის გაუმჯობესება მნიშვნელოვანი პრიორიტეტია. შესაბამისად, საწარმოებიდან დაბინძურების პრევენციის მიზნით, დეპარტამენტმა დანერგა უწყვეტი თვითმონიტორინგის სისტემა. აგრეთვე, რეგულარულად კონტროლდება საწვავის ხარისხი ავტოგასამართ სადგურებზე, რათა შეამციროს არაკონდიციური საწვავის მოხმარება.
