რუსთაველის გამზირისა და მთაწმინდის პარკის დამაკავშირებელი საბაგირო გზა ოფიციალურად გაიხსნა. პროექტი დედაქალაქის მერმა კახა კალაძემ საქართველოს პრემიერ-მინისტრ ირაკლი კობახიძესთან ერთად გახსნა.
კახა კალაძის განცხადებით, ეს საბაგირო გზა დედაქალაქისთვის ისტორიული პროექტის დასრულებას წარმოადგენს. „66 წლის წინ დაწყებული ისტორია დღეს ახალ სიცოცხლეს იძენს. ჩვენი პრიორიტეტი იყო შევინარჩუნოთ ქალაქის ღირშესანიშნაობები და მივანიჭოთ მათ ახალი სიცოცხლე,“ – აღნიშნა მერმა.
საბაგირო გზა ერთბაგირიანი, გონდოლური ტიპისაა, რომელიც რთულ საინჟინრო ნაგებობას წარმოადგენს. პროექტში შედის:
- ქვედა და ზედა სადგურები
- 5 საყრდენი ანძა
- 21 ერთეული 8-კაციანი გონდოლა, რომელიც მგზავრებს 4 წუთში გადაიყვანს.
ამასთან, ახალ საბაგიროს შეუძლია საათში 1200 მგზავრის გადაყვანა.
რუსთაველზე მდებარე ქვედა სადგურის ინტერიერი სრულად განახლდა. პროექტი თავდაპირველად ითვალისწინებდა საბაგიროს მოწყობას რესპუბლიკის მოედანზე, თუმცა მოგვიანებით გადაწყდა, რომ ისტორიული შენობა არ დარჩენილიყო უფუნქციო.
საბაგიროს მშენებლობის პროცესი 2021 წელს დაიწყო, მისი საერთო ღირებულება კი 50 მილიონი ლარი იყო. მშენებლობის პროცესზე პასუხისმგებელი იყო სამშენებლო კომპანია „დაგი“, ხოლო საინჟინრო სამუშაოები საერთაშორისო კომპანიამ „დოპელმაიერმა“ განახორციელა.
თბილისის მერიის გარემოს დაცვის სამსახურმა ქვედა სადგურის მიმდებარედ სკვერი მოაწყო. სკვერში, რომლის ფართობი 1,300 კვადრატული მეტრია, შეიცვალა ინფრასტრუქტურა, მოეწყო შადრევნები, ახალი განათება, საფეხმავლო ბილიკები და სარწყავი სისტემა.
მასალის გამოყენების პირობები