თბილისის საკრებულოში, ქალთა ჯანმრთელობისა და გენდერული თანასწორობის მხარდაჭერის ფარგლებში, საქველმოქმედო გამოფენა გაიმართა, რომელიც მიზნად ისახავს ონკოლოგიური დაავადებების მქონე პაციენტების მხარდაჭერას. ღონისძიება „ევროპა დონა საქართველოს“ და ეროვნული სკრინინგ ცენტრის ჩართულობით გაიმართა.
გამოფენის მონაწილეებს თბილისის საკრებულოს ფრაქცია „ქართული ოცნება-დემოკრატიული საქართველოს“ და გენდერული თანასწორობის საბჭოს წევრი ნათია მოდებაძე მიესალმა. მან ყურადღება გაამახვილა ღონისძიების მნიშვნელობასა და მონაწილეთა ნამუშევრების კრეატიულობაზე.
სიტყვით გამოვიდნენ ეროვნული სკრინინგ ცენტრის დირექტორი ეთერ კიღურაძე და „ევროპა დონა საქართველოს“ პრეზიდენტი ანა მაზანიშვილი, რომლებიც საუბრობდნენ დაავადებების შესახებ ცნობიერების ამაღლებასა და ხელოვანთა როლზე საზოგადოებაში.
მნიშვნელოვანია, რომ ოქტომბერი მსოფლიოში ძუძუს კიბოს შესახებ ცნობიერების ამაღლების საერთაშორისო თვედაა აღიარებული, რაც ამ ღონისძიებას განსაკუთრებულ მნიშვნელობას მატებს. „ვარდისფერი ოქტომბერი“ 1997 წლიდან აღინიშნება და 50-მდე ქვეყანაში ტარდება, რაც სოლიდარობის გამოხატვასა და ჯანსაღი ცხოვრების წესის დანერგვას ემსახურება.
