“თბილისი ცენტრალში“ აცხადებენ, რომ საცალო ვაჭრობის მიმართულებით რეალიზაციის კლების ტენდენცია ნარჩუნდება.
როგორც სავაჭრო ობიექტის დირექტორმა, ლევან ყარალაშვილმა „საქმის კურსის“ ეთერში განაცხადა, ქვეყანაში შექმნილი არასტაბილურობის ფონზე, გაყიდვების დაახლოებით 20%-იანი კლება ფიქსირდება. მისი თქმით, შეიმჩნევა, რომ მოსახლეობის ქცევა შეცვლილია და შედარებით ნაკლებს ხარჯავს.
ლევან ყარალაშვილის განცხადებითვე, ამ ფონზე საცალო ვაჭრობის სექტორში უკვე იმპორტის შემცირების ტენდენციაც შეინიშნება.
„ზოგადი ნეგატიური სიტუაცია, რა თქმა უნდა, ყველაფერზე მოქმედებს და არაერთხელ გაჟღერებულა, რომ თვითონ ქართველი მომხმარებლის ქცევაც კი არის შეცვლილი. როდესაც გაურკვევლობა და არასტაბილური მოლოდინებია, ელემენტარულად ნაკლებს ხარჯავს ხალხი. საცალო ვაჭრობაში დაახლოებით 20%-იანი კლება არის შარშანდელი წლის შესაბამის პერიოდთან შედარებით. მეორე კვარტალი ცოტა გაუმჯობესებაა, იმიტომ, რომ ჩვენ საშუალო სეზონში შევედით.
თუმცა ტურისტული ნაკადების კუთხითაც დიდ ძვრას ვერ ვხედავთ. ერთ-ერთი ძირითადი ბაზარი, როგორიც იყო ისრაელი, დღეს ესეც მეტ-ნაკლებად ჩაკეტილი არის. ამიტომ ამ ჭრილში დადებითი მოლოდინების ქონა დღეს საკმაოდ რთულია. საცალო ვაჭრობის ქსელები ცდილობენ, რომ ოპტიმიზაცია გაუკეთონ თავიანთ დანახარჯებს, შემცირებულია იმპორტის მოცულობაც. რეალურად დღეს ვართ, ასე ვთქვათ, ისევ არსებული სტატუსის შენარჩუნებაზე, რომ ამ შემცირებული გაყიდვების ფონზე არ მოუწიოს ბიზნესებს რაიმე უფრო რადიკალური ნაბიჯების გადადგმა“, – განაცხადა ლევან ყარალაშვილმა.
#drpkhakadze #გიორგიფხაკაძე #davidiani #shenitbilisi #აქხარისხია
