ახალი, თანამედროვე სტანდარტებით აღჭურვილი მრავალფუნქციური სპორტული ცენტრი გაიხსნა მთაწმინდის რაიონში, ლადო ასათიანის #50-ში. სპორტული ცენტრის გახსნაზე თბილისის საკრებულოს თავმჯდომარის მოადგილე ზურაბ აბაშიძე და სპორტისა და ახალგაზრდულ საქმეთა კომისიის თავმჯდომარე გურამ ოქროპირიძე დედაქალაქის მერთან, კახა კალაძესთან ერთად იმყოფებოდნენ.
ცენტრის მშენებლობა 2022 წელს დაიწყო და მისი ჯამური ბიუჯეტი 3,920,087 ლარს შეადგენს. აღნიშნულ ცენტრში მდებარეობს დიდი სპორტული დარბაზი კალათბურთისა და ფრენბურთისთვის, ასევე სატრენაჟორო და ფიტნეს დარბაზები, საშხაპეები და გასახდელები.
დედაქალაქის მიზანი სპორტული ინფრასტრუქტურის განვითარებაა, რაც გულისხმობს ჯანსაღი ცხოვრების წესის პოპულარიზაციას და ახალგაზრდების ხელმისაწვდომობის გაზრდას სპორტის სხვადასხვა სახეობაზე. როგორც ზურაბ აბაშიძემ აღნიშნა, ეს ცენტრი მნიშვნელოვანი ეტაპია ადგილობრივი სპორტის განვითარებისთვის.
მრავალფუნქციური სპორტული ცენტრის გახსნას ასევე ესწრებოდნენ საკრებულოს წევრი ვლადიმერ ბოჟაძე, თბილისის მერის მოადგილე ანდრია ბასილაია, მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა და მთაწმინდის რაიონის გამგებელი დავით კირკიტაძე.
ახალი სპორტული ცენტრი მთაწმინდის მოსახლეობისთვის სპორტის პოპულარიზაციას და ჯანსაღი ცხოვრების წესის განვითარებას შეუწყობს ხელს.
მასალის გამოყენების პირობები
