თბილისში არსებული ქართული მედიცინის ისტორიის მუზეუმი ერთ-ერთი უნიკალური სივრცეა, რომელიც ქართული და მსოფლიო მედიცინის განვითარების ამსახველ მდიდარ კოლექციებს აერთიანებს. მუზეუმი დაარსდა 1963 წელს, ხოლო ოფიციალურად 1967 წელს გაიხსნა. მისი შექმნის ინიციატორი იყო ქართული მედიცინის ისტორიის კვლევის ერთ-ერთი ფუძემდებელი — მიხეილ შენგელია. მუზეუმის ჩამოყალიბებაში მონაწილეობდნენ ასევე ვ. ჟღენტი, კ. ერისთავი, პ. ქავთარაძე, გ. მარუაშვილი და სხვები.
საწყის ეტაპზე მუზეუმი XII საუკუნის ქართული ხუროთმოძღვრების ძეგლში — ლურჯ მონასტერშიფუნქციონირებდა. 1989 წლიდან კი მუზეუმი თბილისის სახელმწიფო სამედიცინო ინსტიტუტის შენობაში გადავიდა.
დღეს მუზეუმში დაცულია 19 000-ზე მეტი ექსპონატი და საარქივო მასალა, მათ შორის:
- პირადი ფონდები და საარქივო დოკუმენტები;
- არქეოლოგიური და ეთნოგრაფიული კოლექციები;
- ლადო გუდიაშვილის, უჩა ჯაფარიძისა და სხვა ცნობილ ქართველ ხელოვანთა ნამუშევრები;
- ძველი სამედიცინო აპარატურა — მათ შორის რუსეთის იმპერიაში პირველი რენტგენის აპარატი;
- სამედიცინო სარუტუალო და მაგიური დანიშნულების ნივთები;
- ანთროპოლოგიური ნიმუშები და ეთნოლოგიური მასალები 40-ზე მეტი ექსპედიციიდან;
- ძველი უნიკალური სამედიცინო ხელნაწერები და წიგნები, მათ შორის ინგლისურენოვანი სამედიცინო ლიტერატურა.
ქართული მედიცინის ისტორიის მუზეუმი არის მედიცინის ისტორიის მუზეუმთა ევროპული ასოციაციის წევრი და ფლობს საერთაშორისო პარტნიორულ კავშირებს. მუზეუმის ბაზაზე არაერთი პროექტი განხორციელდა, მათ შორის სამედიცინო ინფორმაციის ანალიტიკური ცენტრი და მთარგმნელობითი ბიურო.
მუზეუმის ხელმძღვანელად 1963-1995 წლებში მოღვაწეობდა მიხეილ შენგელია, ხოლო 1995 წლიდან დღემდე დირექტორია რამაზ შენგელია.
#drpkhakadze #გიორგიფხაკაძე #davidiani #shenitbilisi #აქხარისხია
