მუხიანის დასახლებაში ყოფილი რადიოქარხნის ტერიტორიის განვითარების ,,რადიოქალაქის” პროექტის პირველი ფაზა რამდენიმე დღეში დასრულდება. ამის შესახებ დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე განაცხადა.
„რადიოქალაქი“, რომელიც 2017 წელს ერთ-ერთი წინასაარჩევნო დაპირება იყო, დედაქალაქის მუნიციპალიტეტი ბიზნესთან თანამშრომლობით ახორციელებს. კალაძის თქმით, პროექტი კაფეებს, ბარებს, სპორტულ და მოსასვენებელ სივრცეებს მოიცავს. 2019 წელს აუქციონის შედეგად გამარჯვებულმა კომპანიამ, შპს „ინდუსტრიულ ქალაქმა“, 23 მლნ ლარად შეიძინა ყოფილი რადიოქარხნის ტერიტორია.
პროექტის ჯამური ინვესტიცია 90 მილიონ ლარამდეა, საიდანაც 43 მილიონი უკვე დახარჯულია. „რადიოქალაქის“ ტერიტორია 12 ჰექტარს მოიცავს და პროექტი სამ ეტაპად მიმდინარეობს. პირველი ეტაპი მალე დასრულდება.
კალაძის განცხადებით, „რადიოქალაქი“ გააერთიანებს 10-ზე მეტ ინდუსტრიას და 200-ზე მეტი ეკონომიკური საქმიანობის წამოწყებას ხელს შეუწყობს, რაც ადგილობრივი მოსახლეობის დასაქმებას გააძლიერებს.
პროექტის ფარგლებში უკვე მოეწყო საერთო სამუშაო სივრცე, რესტორანი და სპორტული მოედნები. სამუშაოები 2025 წლის ბოლოსთვის დასრულდება, რაც მერის თქმით, ერთ-ერთი ძირითადი მიზანია და მუნიციპალური ხელისუფლება მის განხორციელებას მიესალმება.
