თბილისის მერიის ინფრასტრუქტურის განვითარების საქალაქო სამსახურის ინფორმაციით, ვაკის რაიონში, ჯანსუღ კორძაიას ქუჩაზე, უსაფრთხოების უზრუნველსაყოფად დაიწყება გრუნტის დამჭერი რკინა-ბეტონის საყრდენი კედლის მშენებლობა. სამუშაოების ფარგლებში, 19 ნოემბრიდან რამდენიმე თვის განმავლობაში საავტომობილო მოძრაობა დროებით შეიზღუდება.
მშენებლობის პერიოდში, საავტომობილო მოძრაობა სრულად შეიზღუდება ჯანსუღ კორძაიას ქუჩის N10-სა და N14-ს შორის არსებულ საგზაო მონაკვეთზე. აღნიშნული გადაწყვეტილება მიღებულია უსაფრთხოების მიზნით, რათა სამუშაოები ეფექტურად და უსაფრთხოდ განხორციელდეს.
მოსახლეობას და მომხმარებლებს, რომლებსაც გავლა ჯანსუღ კორძაიას ქუჩაზე უწევთ, საშუალება ექნებათ გამოიყენონ ალტერნატიული გზები:
- წყნეთის გზატკეცილიდან ჯანსუღ კორძაიას N10-მდე გადაადგილება და შემდეგ მალხაზ დოლიძის ქუჩის გავლით
- ჯანსუღ კორძაიას N14-მდე მოძრაობა შესაძლებელი იქნება ირაკლი უჩანეიშვილის ქუჩის გავლით
თბილისის მერია ბოდიშს უხდის მოქალაქეებს შექმნილი დისკომფორტისთვის.
