გლდანის რაიონის გამგეობა მუხიანის აგარაკებზე ბორჯომის, ნეკრესის, დაისის, ვანის, ბორითისა და ხვანჭკარის ქუჩებზე საგზაო სამუშაოებს ახორციელებს. ექვსივე ქუჩაზე სულ 26 600 კვ.მეტრამდე ფართობი მოწესრიგდება.
ბორჯომის ქუჩაზე მიმდინარე სამუშაოებს თბილისის მერი კახა კალაძე, მერის მოადგილეებთან ირაკლი ბენდელიანთან და კახა გულედანთან ერთად გაეცნო. კახა კალაძემ აღნიშნა, რომ მუხიანის აგარაკებზე ინფრასტრუქტურული პროექტი ძალიან მნიშვნელოვანი ნაბიჯია, რადგან აქამდე არანაირი კომუნიკაცია არ არსებობდა.
„მუხიანის აგარაკებზე ინფრასტრუქტურული პროექტი მიმდინარეობს. ეს არის დასახლება, სადაც არანაირი კომუნიკაცია არ არსებობდა – არც სანიაღვრე და არც წყალარინების სისტემა. ტერიტორია მთლიანად მოუწესრიგებელი იყო. საავტომობილო გზაზე საუბარიც კი ზედმეტია. იმდენად რთული ვითარება იყო, საზოგადოებრივი ტრანსპორტიც ვერ მოძრაობდა. ეტაპობრივად დავიწყეთ ყველა ქუჩის მოწესრიგება, მოეწყო მიწისქვეშა კომუნიკაციებიც. დღეის მდგომარეობით, ინფრასტრუქტურული სამუშაოები შვიდ ქუჩაზე მიმდინარეობს, რომელსაც გლდანის გამგეობა ახორციელებს. მაისისთვის გვინდა, რომ პროექტი დავასრულოთ, რომლის შემდეგაც, საზოგადოებრივი ტრანსპორტი შეძლებს, აღნიშნულ ქუჩებზე მცხოვრებ მოსახლეობას მოემსახუროს“, – განაცხადა კახა კალაძემ.
საგზაო სამუშაოებისთვის ადგილობრივი ბიუჯეტიდან 5 000 000 ლარი დაიხარჯება. გარდა ამისა, რაჭის ქუჩაზე 850 მეტრზე წყალარინების ქსელი ეწყობა, რისთვისაც 564 000 ლარია გათვალისწინებული.
ადგილზე, დედაქალაქის მერთან ერთად, გლდანის რაიონის გამგებელი ბესიკ კალაძე და პარლამენტის დელეგატი ვლადიმერ ბოჟაძე იმყოფებოდნენ.
#drpkhakadze #გიორგიფხაკაძე #davidiani #shenitbilisi #აქხარისხია
