თბილისის ერთ-ერთი ყველაზე გადატვირთული და პრობლემური მონაკვეთი — გმირთა მოედანი და მისი მიმდებარე ტერიტორია — სრულიად ახალ ინფრასტრუქტურაზე გადადის. დასრულდა მასშტაბური რეაბილიტაცია, რომლის შედეგადაც დედაქალაქში კიდევ ერთი თანამედროვე სატრანსპორტო კვანძი მოეწყო.
თბილისის მერიის ინფორმაციით, პროექტის ფარგლებში სრულად განახლდა გმირთა მოედნიდან ზვიად გამსახურდიას სახელობის სანაპირომდე არსებული საგზაო მონაკვეთი. სამუშაოების ფარგლებში მოწესრიგდა მიწისქვეშა კომუნიკაციები, სავალი ნაწილი, განათება, სანიაღვრე სისტემა, და განხორციელდა ინფრასტრუქტურის სრული მოდერნიზაცია.
რეაბილიტაცია განხორციელდა დაახლოებით 32 000 კვ.მ ფართობზე. დაიგო ახალი ასფალტის საფარი, შეიცვალა ამორტიზებული გაზმომარაგების მილები, საჰაერო სადენები მიწის ქვეშ მოექცა და მოეწყო სანიაღვრე სისტემა, რომელიც აქამდე საერთოდ არ არსებობდა. პროექტი ითვალისწინებდა დასავლური სტანდარტების შესაბამის ინფრასტრუქტურას, მათ შორის შშმ პირებისთვის ადაპტირებულ სივრცეებს.
„ლაგუნა ვერეს“ მიმდებარე ტერიტორია ერთ-ერთი ურთულესი სატრანსპორტო კვანძი იყო, სადაც ყოველთვის საცობი იყო და გადაადგილება ჭირდა. სხვადასხვა მიმართულებით მიმავალი ავტომობილები ხელს უშლიდნენ ერთმანეთს, რაც უდიდეს პრობლემას წარმოადგენდა. დღეს ყველაფერი მოწესრიგებულია – არსებული გზა გაფართოვდა და გახდა სამზოლიანი. ტერიტორიაზე მთლიანად შეიცვალა ინფრასტრუქტურა, მიწისქვეშა კომუნიკაციები. მოეწყო სანიაღვრე სისტემა, რომელიც არ არსებობდა; ჩატარდა გამწვანების სამუშაოები, დამონტაჟდა განათების ბოძები და „ჭკვიანი“ შუქნიშნები, რომლებიც რეალურ დროში გვაძლევს ნაკადების მართვის შესაძლებლობას. პარალელურად, მიმდინარეობს შუქნიშნების კალიბრაცია. პროცესს, დაახლოებით, ათი დღე დასჭირდება, რათა შეირჩეს კონკრეტული ნაკადების გადანაწილების სწორი დრო, რაც მოგვცემს საშუალებას, ყველა მიმართულებით, კიდევ უფრო მეტი სატრანსპორტო საშუალება გავატაროთ. ჩვენ, რა თქმა უნდა, ამ მიმართულებით მუშაობას განვაგრძობთ. მადლობას ვუხდი ყველა იმ ადამიანს, კომპანიებსა და მათ თანამშრომლებს, ვინც ჩართული იყო პროექტში. მართლაც ძალიან კარგი ნამუშევარია“, – განაცხადა კახა კალაძემ.
ზოოპარკის მიმდებარე ტერიტორიაზე მოეწყო ახალი ტიპის საფეხმავლო გადასასვლელი, რომელიც შუქნიშნის ფაზების ავტომატურ ცვლაზეა მორგებული. ამ გზით, ქვეითებს შეუძლიათ დრო არ დაკარგონ და უსაფრთხოდ გადაკვეთონ გზა, ავტომობილების მოძრაობის შეფერხების გარეშე. ეს სისტემაც ხელოვნური ინტელექტის მხარდაჭერით მუშაობს და ქვეითთა კომფორტსა და უსაფრთხოებას ერთდროულად ემსახურება.
ინფრასტრუქტურული მოდერნიზაცია მხოლოდ ასფალტს არ შეეხო — გმირთა მოედანზე ჩატარდა გამწვანების სამუშაოებიც. დაირგო 141 ძირი ხე და ბუჩქი, მოეწყო თანამედროვე სარწყავი სისტემა და 4 450 კვ.მ-ზე დაითესა ბალახის საფარი, რაც ეკოლოგიური ბალანსის დაცვასაც ემსახურება.
სამუშაოები დაფინანსდა თბილისის მუნიციპალიტეტის ბიუჯეტიდან და შეადგენდა 9.5 მილიონ ლარს. პროექტს ახორციელებდა ინფრასტრუქტურის განვითარების საქალაქო სამსახური მერიასთან დაკავშირებულ სხვა უწყებებთან კოორდინაციით.
შენი კალკულატორი — გამოიყენეთ ეს კალკულატორი თქვენი სხეულის მასის ინდექსის (BMI) შესამოწმებლად
კალკულატორი – მიუთითე სქესი და სიმაღლე და გაიგე შენი იდეალური წონა
#drpkhakadze #გიორგიფხაკაძე #davidiani #shenitbilisi #აქხარისხია
მასალის გამოყენების პირობები
