თბილისის მერია ელექტროდამტენების მონტაჟისათვის აუქციონს აცხადებს, რომლის ფარგლებშიც ქალაქის ტერიტორიაზე 200-მდე ლოკაციაზე ახალი, სწრაფი დამტენები დამონტაჟდება. ამის შესახებ დედაქალაქის მერმა, კახა კალაძემ, თბილისის მთავრობის სხდომაზე განაცხადა.
„მინდა, შევეხო დედაქალაქისთვის ერთ-ერთ მნიშვნელოვან საკითხს – სატრანსპორტო პოლიტიკას. იცით, რომ ამ მიმართულებით პირველივე დღიდან არაერთი მნიშვნელოვანი რეფორმა განვახორციელეთ, რომელიც ბევრი კომპონენტისგან შედგება. ჩვენთვის მთავარია, რომ საზოგადოებრივი ტრანსპორტი გავხადოთ კომფორტული, დედაქალაქში გადაადგილება იყოს სწრაფი, რისთვისაც ხორციელდება სხვადასხვა ინფრასტრუქტურული სამუშაო. გარდა ამისა, სრულად განვაახლეთ ავტობუსების პარკი, მიკროავტობუსები, მიმდინარეობს მეტროზე მუშაობა, გამოცხადებული გვაქვს ტენდერი ვაგონების შესყიდვაზე, სრულად შევცვალეთ ძალოვანი კაბელები, ასევე, მოვაწესრიგეთ გამნიავებელი სისტემები და ახალი აგრეგატები იქნა დაყენებული. ვიწყებთ მეტროსადგურების განახლებასაც“, – განაცხადა თბილისის მერმა.
მისივე თქმით, აღნიშნული რეფორმის ფარგლებში მნიშვნელოვანი ადგილი უჭირავს ელექტრომობილების წახალისებას.
„ვაცხადებთ აუქციონს ელექტროდამტენების მონტაჟზე, რომელზე მოთხოვნაც უფრო და უფრო მზარდია. აღნიშნული აუქციონის ფარგლებში, დედაქალაქის ტერიტორიაზე, ელექტროდამტენი 200-მდე ლოკაციაზე დამონტაჟდება. აუქციონი გამოცხადდება სამ ლოტად. თითოეულ ლოტში თანაბრად გადანაწილდება დასამონტაჟებელი დამტენების რაოდენობა; თითოეული მათგანი უნდა იყოს სწრაფად დამტენი აპარატი; აუქციონში გამარჯვებული კომპანია ვალდებული იქნება, აპარატები დაამონტაჟოს და ფუნქციონირება დაიწყოს არაუგვიანეს რვა თვის განმავლობაში; საიჯარო ვადა იქნება 10 წელი“, – განაცხადა კახა კალაძემ.
თბილისის მერის თქმით, ელექტრომობილების გამოყენება საგრძნობლად იზრდება, ამიტომ ადგილობრივმა ხელისუფლებამ გადაწყვიტა, დაეწყო ელექტროდამტენების მონტაჟი ისეთ ადგილებზე, სადაც მოთხოვნა დიდია. აუქციონი ტარდება სამ ლოტად, თითოეული ლოტი მოიცავს 66 დამტენს. თითოეული აპარატი უნდა იყოს სწრაფი დამტენი, რომელიც ფუნქციონირებას დაიწყებს 8 თვის განმავლობაში.
განაცხადების მიღება დაიწყო და გაგრძელდება 20 კალენდარულ დღის განმავლობაში. ბიზნესის წარმომადგენლებს, რომლებიც დაინტერესებულნი არიან, შეუძლიათ მონაწილეობა მიიღონ აუქციონში.
