„თბილისის მშრალი პორტის“ პირველი ფაზა ოფიციალურად იანვარში გაიხსნება. ამის შესახებ Tbilisi Dry Port-ის სამეთვალყურეო საბჭოს თავმჯდომარე ჯემალ ინაიშვილმა პროექტის პრეზენტაციის დასრულების შემდეგ განაცხადა.
პროექტის პირველი ეტაპი 16 მლნ აშშ დოლარის ინვესტიციას ითვალისწინებს. ჯემალ ინაიშვილმა აღნიშნა, რომ ამ ეტაპზე განხორციელებულია სამშენებლო სამუშაოები, მომზადებულია მოედანი და შეყვანილია სარკინიგზო ხაზები, რაც ტერმინალს რკინიგზის სადგურებთან აკავშირებს.
„ამ ეტაპზე შენდება პირველი საწყობი და შეძენილია საჭირო ტექნიკა,“ – განაცხადა ინაიშვილმა.
მთავარი მიზანია, რომ “ფოთის და ბათუმის ნავსადგურები” თბილისის მშრალ პორტს დაუკავშირდეს. როგორც ინაიშვილი აცხადებს, კონტეინერების 70%, რომლებიც ბათუმსა და ფოთის პორტებიდან შემოდის, თბილისზე მოდის.
„ჩვენ ვამცირებთ მანძილს და დროს, რათა ტვირთების მიმღებმა მათ სწრაფად მიიღოს და განაბაჟოს,“ – აღნიშნა მან.
პროექტის მეორე ეტაპი მოიცავს სპეციალიზებული A კლასის საწყობების მშენებლობას, რაც გაზრდილი ინვესტიციით იქნება გამოწვეული. ინაიშვილის თქმით, პროექტი არა მხოლოდ საქართველოს, არამედ სომხეთის, აზერბაიჯანისა და ცენტრალური აზიის ქვეყნებისთვისაც მნიშვნელოვანია.
„რუსეთზე სანქციების გამო, კომპანიები საქართველოს მარშრუტით დაინტერესდნენ, რაც ჩვენი ქვეყნისთვის დიდი შესაძლებლობაა,“ – დასძინა მან.
AD Ports Group-მა ცოტა ხნის წინ „თბილისის მშრალი პორტის“ 60%-იანი წილის შეძენის შესახებ განაცხადა, რაც მათ მთავარ პარტნიორად აქცევს. ახალ ლოგისტიკურ ცენტრს AD Ports Group-ის ლოგისტიკური კლასტერი მართავს.
პროექტის პრეზენტაციას დაესწრო პირველი ვიცე-პრემიერი, ეკონომიკის მინისტრი ლევან დავითაშვილი, რომელმაც განაცხადა, რომ „თბილისის მშრალი პორტის“ პროექტი მნიშვნელოვანი სიგნალია, რომ შუა დერეფნის მარშრუტი სწორად ვითარდება.
„თბილისის მშრალი პორტის“ გახსნა გაზრდის საქართველოს როგორც ლოგისტიკური ჰაბის როლს რეგიონში და ხელს შეუწყობს ეკონომიკის გაძლიერებას.
QR კოდი
სტატიის ციტირება
შენი თბილისი. (2026). „თბილისის მშრალი პორტის“ პირველი ფაზა იანვარში გაიხსნება. 9 მარტი, 2026. https://shenitbilisi.ge/თბილისის-მშრალი-პორტის/
