თბილისის სახელმწიფო კონსერვატორიაში ბავშვთა და ახალგაზრდული გუნდების ფოლკლორული ფესტივალის მონაწილეები დააჯილდოვეს.
ჯილდოები და სიგელები მონაწილეებს დედაქალაქის საკრებულოს განათლებისა და კულტურის კომისიის თავმჯდომარემ კახა ლაბუჩიძემ და საკრებულოს თავმჯდომარის მოადგილემ თინათინ ნიბლოშვილმა გადასცეს.
ბავშვთა და ახალგაზრდული გუნდების ფოლკლორული ფესტივალი, თბილისის მერიის დაფინანსებით და საკრებულოს მხარდაჭერით, უკვე მესამედ ტარდება. ღონისძიების მიზანია არასახელმწიფო დაფინანსებაზე მყოფი თბილისის ბავშვთა ფოლკლორული გუნდების ხელშეწყობა.
ფესტივალის სამხატვრო ხელმძღვანელები არიან ანსამბლ „შავნაბადას“ ხელმძღვანელი, ლოტბარი დავით ცინცაძე და „საგალობელის“ ხელმძღვანელი, ლოტბარი მაია მიქაბერიძე.
კახა ლაბუჩიძემ აღნიშნა, რომ თბილისი მულტიკულტურული და მულტიეთნიკური ქალაქია, და განსაკუთრებით მნიშვნელოვანია, რომ წელს ფესტივალში ეთნიკური უმცირესობების წარმომადგენელთა ფოლკლორული ანსამბლები კვლავ მონაწილეობენ.
„წელს მონაწილეთა რაოდენობა გაზრდილია, და ბოლო ორი წლის განმავლობაში 1000-ზე მეტმა მუსიკოს-მომღერალმა მიიღო მონაწილეობა“, – აღნიშნა ლაბუჩიძემ.
ფესტივალის ფარგლებში, ტრადიციულ მუსიკაში შეტანილი წვლილისთვის ცხრა ფოლკლორული ანსამბლი, მათ შორის აზერბაიჯანული და სომხური ჯგუფები, დაჯილდოვდნენ.
დაჯილდოების ცერემონიას, რომელსაც ეთნომუსიკოლოგი გია ბაღაშვილი უძღვებოდა, ესწრებოდნენ საკრებულოს წევრები, კულტურის სფეროს წარმომადგენლები, აგრეთვე, აზერბაიჯანისა და სომხეთის ელჩები.
ფესტივალი ხელს უწყობს საქართველოს მრავალფეროვანი კულტურის შენარჩუნებას და პოპულარიზაციას, და გრძელვადიანი ინიციატივაა ახალგაზრდა თაობის ხელშეწყობისთვის.
მასალის გამოყენების პირობები
