28 ივნისიდან თბილისის რამდენიმე ქუჩაზე საავტომობილო მოძრაობა ნაწილობრივ შეიზღუდება ინფრასტრუქტურული სამუშაოების გამო. თბილისის მერიის ინფორმაციით, ორი მნიშვნელოვანი პროექტი დაიწყება — სატრანსპორტო კვანძის მოწყობა და ხიდის რეაბილიტაცია.
ნოე ჟორდანიას სანაპიროსა და კოსტა ხეთაგუროვის ქუჩის კვეთაზე იწყება სატრანსპორტო კვანძის მოწყობის სამუშაოები. ამასთან დაკავშირებით, 28 ივნისიდან ივლისის ბოლომდე გზის გარკვეულ მონაკვეთებზე მოძრაობა ეტაპობრივად შეიზღუდება — გზის სხვადასხვა მხარეს, მონაცვლეობით.
ასევე, დაგეგმილია მდინარე მტკვარზე ორთაჭალჰესის ხიდის სრული რეაბილიტაცია. სამუშაოები 28 ივნისიდან დაიწყება და ოთხი თვე გაგრძელდება. აღნიშნულ პერიოდში, ავტოტრანსპორტის მოძრაობა ორ სამოძრაო ზოლში ორმხრივად გაგრძელდება.
თბილისის მერია მოსახლეობას ბოდიშს უხდის შექმნილი დისკომფორტისთვის და მოსახლეობას თავშეკავებას სთხოვს გადაადგილებისას.
#drpkhakadze #გიორგიფხაკაძე #davidiani #shenitbilisi #აქხარისხია
