მედიაჰოლდინგი 《შენი》დგას ქართული წარმოების გვერდით.
24 მარტს, სასტუმრო ბილტმორ თბილისში მეწარმეთა ყოველწლიური სიმპოზიუმი გაიმართა. ღონისძიება „საქართველოს ქალ აუდიტორთა და იურისტთა ასოციაციის“ და „საქართველოს ადვოკატები დამოუკიდებელი პროფესიისათვის“ ორგანიზებით ჩატარდა.
ღონისძიების ფარგლებში გაიმართა მეწარმე ქალების ნამუშევრების გამოფენა-გაყიდვა! სიმპოზიუმი გახსნა „საქართველოს ქალ აუდიტორთა და იურისტთა ასოციაციის“ თავმჯდომარე, თეა ადუაშვილმა, რომელსაც მედიაჰოლდინგი 《შენი》 ესაუბრა:
“4 წელია, რაც ჩვენი ასოციაცია დაფუძნდა და ყოველ წელს მარტის თვეში 100 ქართველი ქალის მხარდასაჭერად ვგეგმავთ სხვადასხვა პროექტებს. დღესაც, ჩვენი თანაორგანიზატორია “საქართველოს იურისტები დამოუკიდებელი პროფესიისთვის” და მათთან ერთად ვაკეთებთ ამ ღონისძიებას მეწარმე ქალების მხარდასაჭერად.
100 მეწარმე ქალზე გვქონდა გათვლილი, რომლებსაც კონსულტაციებს ვუტარებდით სრულიად უსასყიდლოდ. წელს მათი რაოდენობა უკვე 140-მდე გაიზარდა.
ძალიან მნიშვნელოვანია ჩვენს ქვეყანაში ქალის გაძლიერება და ჩვენი ასოციაციით ყოველთვის ვუჭერთ მხარს ქალების ეკონომიკურად გაძლიერებას.
დიდი მადლობა!”
მედიაჰოლდინგი 《შენი》სიმპოზიუმის კიდევ ერთ ორგანოზატორს, ადვოკატ, პროფესორ, “საქართველოს ადვოკატები დამოუკიდებელი პროფესიისათვის” გამგეობის თავმჯდომარე ნინო ლიპარტიასაც ესაუბრა:
“ეს პროექტი წამოვიწყეთ სწორედ იმიტომ, რომ დავინახეთ საჭიროება, რომელიც მეწარმეებსა და განსაკუთრებით ქალ მეწარმეებს სჭირდებათ. ეს ეხება, როგორც სამართლებრივ, ასევე საგადასახადო და აუდიტორულ მხარდაჭერას.
სამწუხაროდ, ჩვენს მეწარმე სუბიექტებს ხშირად არ აქვთ შესაძლებლობა, რომ სამართლებრივი გუნდი ჰყავდეთ. შესაბამისად, მათ თავად უწევთ ამ რისკებთან გამკლავება და მთელი რიგი სამართლებრივი მხარდაჭერის თუ არასამართლებრივი მოქმედების განხორციელება.
ჩვენი მისიაა, მცირე ცოდნა მივცეთ მეწარმე ქალებს, სამართლებრივი ურთიერთობების შესახებ, მათ შორის, დღეს განხილული იქნება ერთ-ერთი ძირითადი საკვანძო საკითხი, ჩემი აზრით, რომელიც საინტერესოა მეწარმე ქალებისათვის – ეს არის შრომითი უფლებები, რაც გვეხება თითოეულ ჩვენგანს, როგორც მეწარმეს, ასევე დამსაქმებელს და ფიზიკურ პირს, დასაქმებულსაც.
ეს შეხვედრა ასევე მოიცავს საგადასახადო ცვლილებების შესახებ ინფორმაციის მიწოდებას. მოგეხსენებათ, საგადასახადო კოდექსში 2024 წლის პირველი იანვრიდან ახალი ცვლილებები შევიდა და ამასთან დაკავშირებით აუდიტორმა, ქალბატონმა ეკატერინე რუხაძემ ისაუბრა.
ჩემი სრული მხარდაჭერა ქალბატონებს, როგორც პროფესიული, ისე პიროვნული. ყოველთვის, ალბათ, სუბიექტური ვარ მათ მიმართ და ყოველთვის ვამბობ, რომ ასეთ შემთხვევაში არ მომეთხოვება ობიექტურობა. მათ მოვუწოდებ, რომ აუცილებლად დასახულ მიზანს მიჰყვნენ, მძიმე შრომას ყოველთვის შედეგი მოსდევს.
რაც შეეხება ჩვენს ორგანიზაციას, მხარს უჭერს მსგავსი პროექტების განხორციელებას და ნებისმიერი სამართლებრივი სირთულის აღმოჩენის შემთხვევაში, ჩვენ მზად ვართ დახმარებისათვის.”
ღონისძიების სპეციალური სტუმარი იყო მსოფლიო პოზიტიური და ტრანსკულტურული აკადემიის წარმომადგენლობის ხელმძღვანელი, ქალთა კლუბის დამფუძნებელი, წარმატების მიღწევის ფსიქოლოგიის ლექტორი, ფსიქოთერაპევტი, ქოუჩი, ლალი ბადრიძე:
“დღევანდელი დღე ძალიან მნიშვნელოვანია, რადგან, რაც ქალებს ყველაზე მეტად გვიჭირს, ეს არის-დასაქმება. აქ, ფაქტობრივად, თვითდასაქმებული ქალები არიან წარმოდგენილკ და როცა მათ ნამუშევრებს ვათვალიერებ… ყველა როგორ იღიმის, ეს იმიტომ, რომ რეალიზებული არიან.
ყოველთვის უნდა ვეცადოთ, ჩვენი თავი ვიპოვოთ. ნამდვილად რთულია, ბევრი ძებნა უნდა, მაგრამ ვინც ეძებს, ის ყოველთვის პოულობს.”
მასალის გამოყენების პირობები
