ნაძალადევის რაიონის გამგეობამ 2024 წელს რამდენიმე ინფრასტრუქტურული და სოციალური პროექტი განახორციელა, რომელთა ჯამური თანხა 30 მილიონ ლარს აღემატება. აღნიშნული ინფორმაცია გამგეობის ერთწლიანი ანგარიშის წარდგენისას თავად ნაძალადევის რაიონის გამგებელმა, ირაკლი ანდღულაძემ გაავრცელა.
მიმდინარე წლის განმავლობაში, განსაკუთრებული ყურადღება დაეთმო საგზაო ინფრასტრუქტურის განვითარებას. მოწესრიგდა 87 ათას კვადრატულ მეტრზე მეტი ფართობი. ასევე, გამგეობამ 154 მისამართზე კაპიტალური და ფრაგმენტული საგზაო სამუშაოები ჩაატარა, 5 მისამართზე სანიაღვრე ქსელი მოაწყო და 18 მისამართზე გრუნტის დამჭერი კედლების მშენებლობა უზრუნველყო.
პროექტების ჩამონათვალში განსაკუთრებული ადგილი ეკავა ქალაქის საყვარელ საჯარო სივრცეებსა და სპორტულ ინფრასტრუქტურას. 10 ადგილობრივ სკვერში საბავშვო ატრაქციონები დამონტაჟდა, ხოლო 8 სპორტული მოედანი სრულად რეაბილიტირდა, კიდევ 2 მოედანი კი ნაწილობრივ აღადგინეს.
ამავე პერიოდში, 192 ინფრასტრუქტურული პროექტი განხორციელდა, რომელთა შორის 51 საცხოვრებელ კორპუსში სახურავის შეკეთება, 43 კორპუსში ლიფტის რეაბილიტაცია და 38 მისამართზე მიწისქვეშა კომუნიკაციები შეცვალა.
რაც შეხება ჯანდაცვისა და სოციალური დახმარების პროგრამებს, 18 000-ზე მეტმა ბენეფიციარმა მიიღო დაფინანსება.
როგორც ირაკლი ანდღულაძემ აღნიშნა, 2024 წლის ბიუჯეტმა უკვე უზრუნველყო მნიშვნელოვანი ნაბიჯები სოციალური და ინფრასტრუქტურული პროექტების განსახორციელებლად. 2025 წლის ბიუჯეტი ასევე იქნება ორიენტირებული ქალაქის განვითარების, მოსახლეობის კეთილდღეობისა და სოციალურ-ეკონომიკური მდგომარეობის გასაუმჯობესებლად.
პრეზენტაციას თბილისის მერის მოადგილე კახა გულედანი, პარლამენტის წევრი ირაკლი ხელაძე და დედაქალაქის მერიის სხვა წარმომადგენლები დაესწრნენ.
