თბილისის მერიის მუნიციპალიტეტის მთავრობის სხდომაზე მერმა კახა კალაძემ თბილისის მუნიციპალურ ინსპექციას დაავალა, დეკემბრის ბოლომდე სრულად აღწეროს უნებართვო გარე ვაჭრობაში ჩართული მოქალაქეების რიცხვი. მისი თქმით, მერიას უნდა ჰქონდეს სრული სურათი, თუ რამდენი ადამიანი საჭიროებს მხარდაჭერას ალტერნატიულ სივრცეებში საქმიანობის გასაგრძელებლად.
კალაძემ განაცხადა, რომ უსახური კონსტრუქციების თვითნებური განთავსება და უნებართვო გარე ვაჭრობა ქალაქისთვის დიდ პრობლემას წარმოადგენს. მისი ინფორმაციით, მუნიციპალური ინსპექცია ამ მიმართულებით აქტიურად მუშაობს: არაერთ პრობლემურ ლოკაციაზე არაორგანიზებული საქმიანობა უკვე აღკვეთილია და ტერიტორიები მოწესრიგებულია, ყოველდღიურად კი მონიტორინგი და რეაგირება მიმდინარეობს.
სავაჭრო სივრცეები რაიონებში
მერმა თქვა, რომ გასაგებია ამ საქმიანობით დაკავებული ადამიანების მდგომარეობაც, რადგან ესენი არიან ოჯახები, რომლებსაც უჭირთ. მისი განმარტებით, მუნიციპალიტეტს სურს პრობლემა უმტკივნეულოდ გადაწყვიტოს, თუმცა ვაჭრობა უნდა მიმდინარეობდეს ცივილურ ფორმებში.
კალაძემ რაიონების გამგებლებს დაავალა, მოიძიონ ადგილები, სადაც სავაჭრო სივრცეების მოწყობა იქნება შესაძლებელი, როგორც ეს ბევრ ევროპულ ქალაქშია. მისი თქმით, ეს შეიძლება იყოს არა ყოველდღიურ რეჟიმში, არამედ, მაგალითად, კვირაში სამი დღე – პარასკევი, შაბათი და კვირა. შესაბამისი დახლების მოწყობის შემდეგ დასუფთავების პასუხისმგებლობას მერიის სამსახური აიღებს.
მერმა დასძინა, რომ მსგავსი პრაქტიკა რუსთაველის გამზირის რეაბილიტაციის დაწყებამდე პარლამენტის მიმდებარე ტერიტორიაზე არსებობდა. გამგებლებს ასევე დაევალათ, რაიონების მიხედვით დაიწყონ კომუნიკაცია სავაჭრო ობიექტებთან და იმ მოქალაქეებთან, რომლებიც სხვადასხვა კატეგორიის პროდუქციას ყიდიან, რათა თითოეულს ალტერნატიული სამუშაო სივრცე ჰქონდეს.
წყარო: თბილისის მერია
#drpkhakadze #sheniekimi
