თბილისში კიდევ ერთი მნიშვნელოვანი ინფრასტრუქტურული პროექტი იწყება — კოსტა ხეთაგუროვის ქუჩასა და ნოე ჟორდანიას სახელობის სანაპიროს შორის ახალი სატრანსპორტო კვანძი მოეწყობა. პროექტს ახორციელებს თბილისის მერიის ინფრასტრუქტურის განვითარების საქალაქო სამსახური, ტრანსპორტისა და ურბანული განვითარების სააგენტოსთან ერთად.
რა შეიცვლება პროექტის ფარგლებში?
- სრულად განახლდება გარე განათების სისტემა
- დამონტაჟდება ენერგოეფექტური LED სანათები
- ჩატარდება სანიაღვრე ქსელის და გზის სავალ ნაწილების რეაბილიტაცია
- დამონტაჟდება ჭკვიანი შუქნიშნები
- მოეწყობა უსაფრთხოების კუნძულები და განახლებული ტროტუარები
დედაქალაქის მერმა კახა კალაძემ ადგილზე დაათვალიერა სამუშაო პროცესი და აღნიშნა, რომ პროექტი მნიშვნელოვნად გააუმჯობესებს როგორც ავტომობილებით, ისე ქვეითად გადაადგილების პირობებს:
„სამუშაოების შედეგად, არსებული მდგომარეობა მთლიანად შეიცვლება – ავტომობილით გადაადგილება დარეგულირდება შუქნიშნებით, რაც საგზაო მოძრაობას გაამარტივებს და გამტარუნარიანობას გაზრდის. გარდა ამისა, ქვეითებისთვის ეწყობა ზებრა გადასასვლელები, რომელთა საშუალებით სანაპიროსთან დაკავშირება იქნება შესაძლებელი; მოწესრიგდება ტროტუარები, დამონტაჟდება განათების ბოძები ლედ სანათებით, გამწვანდება კუნძულები, რომელზეც ახლა სამუშაოები მიმდინარეობს. პროექტი მთლიანად დასრულდება აგვისტოში“, – განაცხადა კახა კალაძემ.
პროექტის ფარგლებში შეიქმნება უსაფრთხო საქვეითო კავშირი მტკვრის მარცხენა სანაპიროდან ბარათაშვილის ხიდის მიმართულებით, რაც ქვეითთა გადაადგილებას მეტად კომფორტულსა და დაცულს გახდის.
პროექტის დასრულება დაგეგმილია აგვისტოში, ხოლო მისი საერთო ღირებულება შეადგენს 2 მილიონ ლარს.
სამუშაოების მიმდინარეობისას ავტომობილების მოძრაობა ეტაპობრივად, ნაწილობრივ შეიზღუდება.
მიმდინარე სამუშაოებს მერთან ერთად ესწრებოდნენ: ინფრასტრუქტურის განვითარების საქალაქო სამსახურის უფროსი გიორგი აბუთიძე, ტრანსპორტისა და ურბანული განვითარების სააგენტოს უფროსი ნინო ბაგაშვილი, ჩუღურეთის გამგებელი დავით მაქაცარია, პარლამენტისა და საკრებულოს წევრები.
#drpkhakadze #გიორგიფხაკაძე #davidiani #shenitbilisi #აქხარისხია
