„თბილისის განვითარების ფონდმა“ ფიროსმანის ქუჩა N29-ში მდებარე ისტორიული შენობის რეაბილიტაცია დაიწყო. როგორც თბილისის მერმა, კახა კალაძემ განაცხადა, აღნიშნული პროექტი თბილისის მუნიციპალიტეტის მთავრობის სხდომაზე განიხილეს და აღინიშნა, იქიდან გამომდინარე, რომ შენობა ისტორიული ძეგლია, ყველა დეტალს განსაკუთრებული ყურადღება მიექცევა და თითოეული ორნამენტი შენარჩუნებული იქნება.
„თბილისის განვითარების ფონდმა“ ჩუღურეთის რაიონში, ფიროსმანის ქუჩა N29-ში არსებული შენობა-ნაგებობის რეაბილიტაცია ხორციელდება. აღნიშნულ მისამართზე ქართველი მხატვრის, ნიკო ფიროსმანის სახელმწიფო მუზეუმიც მდებარეობს. შენობა, რომლის ფასადმა ჩვენამდე უცვლელად მოაღწია, აგებულია მე-19 საუკუნის ბოლოს. არქიტექტურული თვალსაზრისით, ნაგებობა ეკლექტიკური სტილის მატარებელია და მხატვრული გამომსახველობითა და პროპორციებით, ქუჩას ორგანულად ერწყმის.
პროექტის მოთხოვნებიდან გამომდინარე, განხორციელდება: საძირკვლისა და კედლების აღდგენა-გამაგრების სამუშაოები; ფასადების აღდგენა-მოწესრიგება მათი პირვანდელი სახით; ყველა დეტალს განსაკუთრებული ყურადღება მიექცევა, თითოეული ორნამენტი შენარჩუნებული იქნება. ეზოს ნაწილში არსებული ამორტიზებული და დაზიანებული ხის დეკორატიული ელემენტებისა და შუშაბანდების პირვანდელი სახით აღდგენა მოხდება. ასევე, იგეგმება კომუნიკაციების, წყლისა და წყალარინების ქსელების, ელექტროსადენების მოწესრიგება, როგორც მიწის ქვეშ, ისე მიწის ზემოთ“, – აღნიშნა თბილისის მერმა.
როგორც კახა კალაძემ აღნიშნა, აღნიშნული შენობის რეაბილიტაცია არა მხოლოდ კულტურული მემკვიდრეობის დაცვას, არამედ მოსახლეობის კეთილდღეობასაც ემსახურება.
„რეაბილიტაციის დასრულების შემდეგ 53 ბენეფიციარს საცხოვრებელი პირობები საგრძნობლად გაუუმჯობესდება და მათი უძრავი ქონების ღირებულება კიდევ უფრო გაიზრდება. ძალიან მიხარია ამ ოჯახების სიხარული და ბედნიერება“, – განაცხადა დედაქალაქის მერმა
სარეაბილიტაციო სამუშაოები დაახლოებით 18 თვეში დასრულდება, რის შემდეგაც ამ ქუჩის ვიზუალური იერსახე კიდევ უფრო მიმზიდველი გახდება. დედაქალაქის მერმა ასევე წარმოადგინა ვიზუალური მასალა, სადაც აჩვენებს, როგორ მიმდინარეობს შენობის ისტორიული სახის აღდგენა.
#drpkhakadze #გიორგიფხაკაძე #davidiani #shenitbilisi #აქხარისხია
